മകരവിളക്കിന് ഒരുങ്ങി ശബരിമല : തിരുവാഭരണവും വഹിച്ചുള്ള ഘോഷയാത്ര പന്തളത്തുനിന്ന് പുറപ്പെട്ടു.

 പത്തനംതിട്ട: ശബരിമലയിൽ മകരവിളക്ക് ദിവസം അയ്യപ്പ വിഗ്രഹത്തിൽ ചാർത്താനുള്ള തിരുവാഭരണവും വഹിച്ചുള്ള ഘോഷയാത്ര പന്തളത്ത് നിന്ന് പുറപ്പെട്ടു. വലിയ കോയിക്കൽ ക്ഷേത്രത്തിൽ ഒരുക്കങ്ങൾ എല്ലാം പൂർത്തിയായി. ജനുവരി 14നാണ് മകരവിളക്ക്.

 ഉച്ചയ്ക്ക് 12 മണിക്ക് പന്തളം വലിയ കോയിക്കൽ ക്ഷേത്രത്തിൽ തിരുവാഭരണ ദർശനത്തിന് ശേഷം പ്രത്യേക പൂജകൾക്ക് ശേഷമാണ് ഘോഷയാത്ര പുറപ്പെട്ടത്. പരമ്പരാഗത പാതയിലൂടെ വിവിധ ക്ഷേത്രങ്ങളും കടന്നു ഘോഷയാത്ര പതിനാലിന് ഉച്ചയ്ക്ക് ചെറിയാനവട്ടത്ത് എത്തും. തുടർന്ന് നീലിമല താണ്ടി വൈകീട്ട് അഞ്ചുമണിക്ക് ശരംകുത്തിയിൽ എത്തിച്ചേരും. അവിടെ ഘോഷയാത്രയെ ദേവസ്വം പ്രതിനിധികൾ ചേർന്ന് ആചാരപരമായ സ്വീകരിച്ച് സന്നിധാനത്തേക്ക് ആനയിക്കും. തുടർന്ന് തിരുവാഭരണം ചാർത്തി ദീപാരാധന. ഈ സമയം പൊന്നമ്പലമേട്ടിൽ മകര ജ്യോതി  തെളിയും.