മനു മൻജിത്തിന് ഗിരീഷ് പുത്തഞ്ചേരി "സൂര്യകിരീടം" അവാർഡ്.

അത്തോളി: അത്തോളി ഗ്രാമപഞ്ചായത്ത് നടത്തി വരാറുള്ള ഗിരീഷ് പുത്തഞ്ചേരി അനുസ്മരണം ഫിബ്രവരി 10ന് നടക്കും. ഈ വർഷം മുതൽ ഗിരീഷ് പുത്തഞ്ചേരി സൂര്യകിരീടം അവാർഡ് ഏർപ്പെടുത്തിയിട്ടുണ്ട്.

 സിനിമാ ഗാനരചയിതാവ് മനു മൻജിത്തിനാണ് പ്രഥമ പുരസ്കാരം. മികച്ച യുവ സിനിമാഗാനരചയിതാവ് എന്ന നിലയ്ക്കാണ് മനുമൻജിത്തിനെ തിരഞ്ഞെടുത്തതെന്ന് ഗ്രാമപഞ്ചായത്ത് പ്രസിഡണ്ട് ബിന്ദു രാജൻ പറഞ്ഞു.   സുനിൽ കൊളക്കാട്, അജീഷ് അത്തോളി, സബിത സി.കെ.എന്നിവരാണ് ജൂറി  അംഗങ്ങൾ.   ഫലകവും പ്രശസ്തിപത്രവും ഫിബ്രവരി 10ന് വൈകീട്ട് 6 മണിയ്ക്ക് കൂമുള്ളി വായനശാലയ്ക്ക് സമീപത്ത് നടക്കുന്ന ഗിരീഷ് പുത്തഞ്ചേരി അനുസ്മരണ സദസിൽ വെച്ച് സിനിമാ സംവിധായകൻ വി.എം.വിനു സമ്മാനിക്കും.

 വായനശാലയിൽ രാവിലെ 9.30 ന് പുഷ്പാർച്ചനയും 10 മണി മുതൽ ഗാനാലാപനം, കവിത, ചിത്രരചന മത്സരവും നടക്കും. വൈകീട്ട് 5 മണിയ്ക്ക് സിനിമ സംവിധായകൻ വി.എം.വിനു സാംസ്കാരിക സദസ് ഉദ്ഘാടനവും മനു മൻജിത്തിന്  അവാർഡും  നല്കും. ഗ്രാമ പഞ്ചായത്ത് പ്രസിഡണ്ട് ബിന്ദു രാജൻ അദ്ധ്യക്ഷം വഹിക്കും. ചടങ്ങിൽ വച്ച് അത്തോളി പഞ്ചായത്തിലെ കലാരംഗത്ത് വിവിധ മേഖലകളിൽ മികവ് തെളിയിച്ച ലീലാവതി ടീച്ചർ ( തകഴി ബാലസാഹിത്യ അവാർഡ് ജേതാവ്), വിനോദ് അത്തോളി (അന്തർ ദേശീയ ഫോട്ടോഗ്രാഫി അവാർഡ് ജേതാവ്), കബനി ( സിനിമാ നടി), സി.റിയോന, അശ്വിനി അജീഷ് (സ്കൂൾ കലോത്സവത്തിൽ നാടകത്തിനുള്ള സംസ്ഥാന അവാർഡ് ജേതാക്കൾ) എന്നിവരെ അനുമോദിക്കും. ഗ്രാമ പഞ്ചായത്ത് മെമ്പർമാർ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ ആശംസകൾ അർപ്പിക്കും. തുടർന്ന് വിവിധ കലാപരിപാടികളും രാത്രി 8 മണിയ്ക്ക് മെഗാ കരോക്കേ ഗാനമേളയും  അനുസ്മരണത്തോടനുബന്ധിച്ചു നടക്കും.